РУС АДЫГ

Адыгэ къуаер Адыгэ Республикэр ары къызыщашIыщтыр

13.09.2017

Шъолъыр зэфэшъхьафхэм язаводиплIымэ ятхьаусыхэ тхылъ щигъэзыягъ интеллектуальнэ фитыныгъэхэмкIэ Хьыкумым и Президиум. Адыгеим къыхимыубытэрэ чIыпIэхэм адыгэ къуаер къащыдагъэкIыным фэбанэщтыгъэх ахэр.

Шъугу къэтэгъэкIыжьы: мы илъэсым мэлылъфэгъум интеллектуальнэ фитыныгъэхэмкIэ Хьыкумым адыгэ къуаер Адыгеим ипредприятиехэм анэмыкI къыдимыгъэкIыным фэгъэхьыгъэ унашъо ышIыгъ. Анахьэу етIани Хьыкумым иунашъо къыщыхигъэщыгъэр а гъомылапхъэм нэшэнэ гъэнэфагъэу иIэхэр ары.

«Технологие гъэнэфагъэхэмкIэ а къуаер агъэхьазыры (мэтэ блэр цIыкIухэм адыгэ къуаер ащафырзы, чэмым къыкIащыгъакIэ щэр агъэфедэ, ащ епхыгъэ Iофтхьэбзэ гъэнэфагъэхэр IэкIэ зэшIуахых). Ежь лъэпкъым инэшанэхэм, икультурэ, къуаем иихынкIэ IэпэIэсэныгъэу яIэм ялъытыгъэу щыт адыгэ къуаер адрэхэм къахэзыгъэщырэр. Ащ нэмыкIэу къэтхыхьаным анахьэу къыщыхагъэщырэр къуаем иихын епхыгъэ Iофыгъо гъэнэфагъэхэр цIыфым ыIэкIэ зэрэзэшIуихыхэрэр ары», — къыщеIо документым.

Къуаем ишIын зыпарэкIи фытемыгъэпсыхьэгъэ, ащ зыпарэкIи емыпхыгъэ цIыфхэм коммерческэ гухэлъхэм апае ар агъэфедэнэу зэрэщымытыр Хьыкумым хигъэунэфыкIыгъ.

КIэкIэу къэпIон хъумэ, непэкIэ адыгэ къуаер къышIыным ифитыныгъэ зиIэхэр Адыгеим Iоф щызышIэхэрэ предприятие закъохэр ары.

«Тэгугъэ зэрэхэгъэгоу ищапIэхэм адыгэ къое шъыпкъэр — зыфэдэн фэе шъыпкъэм диштэрэр — шIэхэу къатехьанэу. Тицыхьэ телъ ар зыIэкIахьэхэрэм чIыпIэ зэфэшъхьафхэм къащашIыщтыгъэ къуаем елъытыгъэмэ, зэратекIырэр къызэрашIэщтым. Адыгеим ипредприятиехэу гъэщым хэшIыкIыгъэхэм афэгъэзагъэхэм экономикэм ылъэныкъокIэ шIогъэшхо ащ къафихьыщт, сыда пIомэ Урысыем ыкIи СНГ-м ихэгъэгухэм мазэ къэс адыгэ къое тонн мин фэдиз ащащэ. Республикэм икъоешIхэм IофшIэпIэ чIыпIакIэхэр яIэхэ хъущт, бюджет зэфэшъхьафхэм хэбзэIахьэу арыхьэрэми хэпшIыкIэу зыкъиIэтыщт», — къыIуагъ Адыгэ Республикэм и Премьер-министрэ игуадзэу Сапый Вячеслав.

Шъугу къэтэгъэкIыжьы: «Адыгэ къуаер къэзышIыхэрэм я Союз» гугъапIэ къеты Адыгеим къыщашIырэ къуаем изытет зэрэдэгъущтымкIэ. Адыгеим и ЛIышъхьэу КъумпIыл Мурат игъоу ылъэгъуи, мы илъэсым мэкъуогъум а общественнэ организациер зэхащэгъагъ. Щэ продукциер къэзышIырэ фирми 7 Союзым хэхьагъ, джыри предприятие заулэ ащ хэгъэхьэгъэным иIофыгъо хэплъэх.

Адыгэ Республикэм и ЛIышъхьэ ипресс-къулыкъу



Возврат к списку