РУС АДЫГ

Адыгеим и ЛIышъхьэ журналистхэм зэдэгущыIэгъу адыриIагъ

08.06.2018

ФедерациемкIэ Советым ителеканалэу «Вместе – РФ» зыфиIорэм исъемочнэ куп Адыгеим щыI. Журналистхэм республикэм, парламентым иапшъэрэ палатэ Адыгеим ихабзэ зэрэдэлажьэрэм яхьылIэгъэ сюжет агъэхьазыры.

Адыгэ Республикэм и ЛIышъхьэу КъумпIыл Мурат лъэныкъохэм Iоф зэрэзэдашIэрэм, Адыгэ Республикэм ихэбзэ къулыкъухэмрэ Урысые Федерацием и Федеральнэ ЗэIукIэ ФедерациемкIэ и Советрэ шIуагъэ къытэу зэрэзэдэлажьэ­хэрэм афэгъэхьыгъэу журналистхэм къафиIотагъ.

Язэдэлэжьэныгъэ пэублэ фэхъугъэр Урысые Федерацием ишъолъырхэм ясыхьат къыхиубытэу 2016-рэ илъэсым мэлылъфэгъум и 25 — 27-м Адыгэ Республикэм и Мафэхэр ФедерациемкIэ Советым зэрэщызэхащэгъагъэхэр ары. 2017-рэ илъэсым мэлылъфэгъум и 27-м ФедерациемкIэ Советым экономикэ политикэмкIэ и Комитет изэхэсыгъоу «Особенности социально-экономического развития субъектов Российской Федерации в современных условиях (на примере Республики Адыгея)» зыфиIорэр Мыекъуапэ щызэхащэгъагъ.

«Республикэм игъэхъагъэхэмрэ ип­шъэ­рылъхэмрэ тыкъызэратегущыIагъэм имызакъоу, мэхьанэшхо зиIэ Iофыгъохэри къэтIэтыгъагъэх, ахэм ащыщыбэ ФедерациемкIэ Советыр, Къэралыгъо Думэр, Урысые Федерацием и Правительствэ къыддеIэхэзэ, зэшIотхын тлъэ­кIыгъ. Ар афэгъэхьыгъ псырыкIуапIэр зэрагъэпсыгъэм, транспортыр бэу зыщызекIощтыгъэ гъогум изы Iахь федеральнэ мылъкум зэрэхагъэхьажьыгъэм. Матвиенко Валентина Иван ыпхъум тыфэраз тиреспубликэкIэ мэхьанэшхо зиIэ социальнэ Iофыгъохэм язэшIохынкIэ IэпыIэгъу къызэрэтфэхъурэм фэшI», — хигъэунэфыкIыгъ КъумпIыл Мурат.

Сенаторхэр къадеIэхэзэ дэкIыгъо зэхэсыгъохэр, зэIукIэгъухэр зэрашIыгъэ­хэм республикэм и Мафэхэр Урысые Федерацием зэрэщызэхащагъэхэм Адыгеим и ЛIышъхьэ анаIэ тыраригъэдзагъ.

Адыгеим ыцIэкIэ сенаторитIу ФедерациемкIэ Советым щэлажьэ. Республикэм изаконодательнэ хабзэ илIыкIор Хъопсэрыкъо Мурат, Адыгеим икъэралыгъо хабзэ игъэцэкIэкIо къулыкъу илIыкIор Олег Селезневыр ары.

Журналистхэр джащ фэдэу промышленностым, мэкъу-мэщым, туризмэм хэхъоныгъэ ашIынымкIэ, федеральнэ программэхэм ахэлэжьэнхэмкIэ амалэу щыIэхэм къакIэупчIагъэх, социальнэ лъэныкъом епхыгъэ упчIэхэри къатыгъэх. Республикэм и ЛIышъхьэ экономикэм, бизнесым хэхъоныгъэ зэра­шIыщт лъэныкъохэм, Адыгеим инвестициехэр нахьыбэу къыхалъхьанхэмкIэ Iофтхьабзэу зэрахьащтхэм къатегущыIагъ. Джащ фэдэу Адыгэ Республикэм и ЛIышъхьэ шъолъырым ыпашъхьэ ит пшъэрылъхэм афэгъэхьыгъэу къафиIотагъ.

«Лъэшэу тынаIэ зытедгъэтын, ткIуачIэ зэтхьылIэн фэе Iофыгъуабэ джыри зэшIотхынэу тапэ илъ. Къэралыгъо хабзэм икъутамэхэм яшъыпкъэу зэдэлажьэхэ зэрашIоигъом мэхьанэшхо иI. Республикэмрэ ФедерациемкIэ Советымрэ зы пшъэрылъышху зэдэдгъэцакIэрэр — цIыфхэм ящыIэкIэ-псэукIэ зыкъегъэ­Iэтыгъэныр ары. ТапэкIи шIуагъэ къытэу тызэрэзэдэлэжьэщтым, тиреспубликэ щыпсэухэрэм яфедэхэм ар зэрадиштэщтым сицыхьэ телъ», — хигъэунэфыкIыгъ КъумпIыл Мурат.

Адыгэ Республикэм и ЛIышъхьэ ипресс-къулыкъу



Возврат к списку