РУС АДЫГ

Зэзэгъыныгъэм зэдыкIэтхагъэх

26.06.2018

Адыгеим и ЛIышъхьэу КъумпIыл Муратрэ коммерческэ банкэу «Кубань Кредит» зыфиIорэм иправление итхьаматэу Нина Чупрынниковамрэ республикэм и Правительствэ и Унэ зэдэлэжьэныгъэм фэгъэхьыгъэ зэзэгъыныгъэм тыгъуасэ щызэдыкIэтхагъэх.

ЛъэныкъуитIуми къыхагъэщыгъ республикэм инвестициехэр нахьыбэу къихьанхэмкIэ, цIыфхэм, джащ фэдэу бизнес-сообществэм ябанк фэIо-фашIэхэр нахьышIоу зэшIохыгъэнхэмкIэ зэдашIыгъэ зэзэгъыныгъэм ишIуагъэ къызэрэкIощтым яцыхьэ зэрэтелъыр.

Зэзэгъыныгъэм кIэтхэнхэ зэхъум щыIагъэх ООО-у «Кубань Кредит» зыфиIорэм илъыплъэкIо совет итхьаматэу Виктор Будариныр, Адыгэ Республикэм и Премьер-министрэ игуадзэу Сапый Вячеслав, Адыгэ Республикэм экономикэ хэхъоныгъэмкIэ иминистрэу Олег Топоровыр, къалэу Мыекъуапэ имэр игуадзэу Китарие Аслъан.

«КIэлэцIыкIу ибэхэм апае унэхэр республикэм щашIыхэ зэхъум ООО-у «Кубань Кредит» зыфиIорэм гъусэныгъэ дытиIагъ. Социальнэ-экономикэ лъэныкъомкIэ республикэ программэхэм ыкIи проектхэм тапэкIи банкыр чанэу къахэлэжьэным АдыгеимкIэ мэхьанэшхо иIэу щыт. Пстэуми апэу ар зыфэгъэхьыгъэр бизнес цIыкIумрэ гурытымрэ яинфраструктурэ, экономикэм, инвестиционнэ проектхэм, ипотекэ кредитхэм, банк фэIо-фашIэхэу цIыфхэмрэ бизнесымрэ аIэкIагъахьэхэрэм япхыгъэ Iофтхьабзэхэр нахьышIоу зэшIохыгъэнхэр, ахэм IэпыIэгъу ятыгъэныр ары» — къыIуагъ КъумпIыл Мурат.

Нина Чупрынниковамрэ Виктор Бударинымрэ къызэрэхагъэщыгъэмкIэ, илъэс 25-рэ хъугъэу банкым гъэхъагъэ хэлъэу Къыблэ федеральнэ шъолъырым Iоф щешIэ Краснодар краим, Адыгеим ыкIи Ростов хэкум яэкономикэ инвестициехэр хилъхьэхэзэ. Филиалыбэ зэрэщыIэм ишIуагъэ къэкIо организацие пстэуми, предприятиехэм ыкIи цIыфхэм адэлэжьэнхэмкIэ.

Мы лъэхъаным банкым Тэхъутэмыкъое районымкIэ псэупIэу Инэм офис щыриI. Джащ фэдэу Мыекъуапэ офисыкIэ щегъэпсы, мы илъэсым Iоныгъом ар атIупщын мурад яI.



Возврат к списку