РУС АДЫГ

Якъэлэм мыуцэкунэу

12.01.2018

Адыгэ Республикэм и ЛIышъхьэу КъумпIыл Мурат урысые печатым и Мафэ ипэгъокIэу республикэ гъэзетхэу «Адыгэ макъэмрэ» «Советскэ Адыгеимрэ» яIофышIэхэм тыгъуасэ аIукIагъ, ямэфэкIкIэ ахэм къафэгушIуагъ.

Республикэм ипащэ «Советскэ Адыгеим» Iоф щызышIэхэрэм адэгущыIагъ, кабинетхэр къыплъыхьагъэх. Нэужым «Адыгэ макъэм» иколлектив гущыIэгъу фэхъугъ, ахэр зыгъэгумэкIырэ Iофыгъохэм защигъэгъозагъ. Гъэзетхэм Iоф ащызышIэхэрэм якабинетхэм гъэцэкIэжьынхэр яшIылIэгъэнхэмкIэ IэпыIэгъу зэрафэхъущтымкIэ къыгъэгугъагъэх. АР-м и ЛIышъхьэ ишIуагъэкIэ «Адыгэ макъэр» зытет къатым изы лъэныкъо зэтырагъэпсыхьагъ, джы адрэ къэнагъэр агъэцэкIэжьынэу ары.

Редакциехэм язытет зызэригъэлъэгъу нэуж КъумпIыл Мурат «Адыгэ макъэм» къыщыуцугъ, зэдэгущыIэгъур щылъагъэкIотагъ. АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, ыпшъэкIэ зигугъу къэтшIыгъэ гъэзетхэм яредактор шъхьаIэхэу Дэрбэ Тимуррэ Цундышк Зарэрэ зэдэгущыIэгъу адыриIагъ. Пстэуми апэу — редакциехэм Iоф ащызышIэхэрэм ямэфэкIкIэ республикэм ипащэ къафэгушIуагъ, гъэхъагъэхэр ашIыхэзэ ыпэкIэ лъыкIотэнхэу къафэлъэIуагъ.

— IофшIэнэу жъугъэцакIэрэм мэхьанэшхо зэриIэм щэч хэлъэп, общественнэ еплъыкIэр шъоры зыгъэпсырэр, шъолъырым ихъухьэрэ къэбархэр шъыпкъагъэ хэлъэу цIыфхэм алъышъогъэIэсы, ащкIэ лъэшэу тышъуфэраз. ШъуиIофшIэн шъхьэкIэфэныгъэшхо фэтэшIы, шъо шъуалъэныкъокIэ джыри пшъэрылъхэр нахьышIоу зэшIошъухынхэу, гъэзетхэр нахь гъэшIэгъонэу зэрэшъушIыщтым шъупылъынэу тыкъышъущэгугъы. ГъэцэкIэжьынхэм алъэныкъокIи, лэжьапкIэмкIи IэпыIэгъу тыкъышъуфэхъунымкIэ амалхэм тяусэщт, тишIуагъэ къышъодгъэкIыщт, — къыIуагъ КъумпIыл Мурат.

Дэрбэ Тимур гущыIэр зештэм, лъэпкъ гъэзетым ынаIэ къызэрэтетымкIэ, IэпыIэгъу къызэрэфэхъурэмкIэ АР-м и ЛIышъхьэ зэрэфэразэр къыIуагъ. «Адыгэ макъэр» зыщыIэр мыгъэ илъэс 95-рэ зэрэхъурэм, ащ ихэгъэунэфыкIын зызэрэфагъэхьазырырэм, нэмыкI Iофыгъоу зэшIуахыхэрэм, гъэхъагъэу ыкIи гумэкIыгъоу щыIэхэм республикэм ипащэ ащигъэгъозагъ. Адыгэ Республикэм иархив къыхэнэжьыгъэ лъэпкъ гъэзетэу адыгабзэкIэ (арап шрифтым итэу) ыкIи урысыбзэкIэ 1926-рэ илъэсым къыдэкIыгъагъэм иномер КъумпIыл Мурат шIухьафтынэу ритыгъ.

«Советскэ Адыгеим» джырэ уахътэ анахьэу ынаIэ зытыригъэтырэ лъэныкъохэм, гъэзетыр нахь гъэшIэгъон хъунымкIэ Iофэу ашIэрэм Цундышк Зарэ къатегущыIагъ.

Шъхьэлэхъо Аскэр ынаIэ зытыридзагъэр гъэзетхэм зэракIатхэхэрэм, ахэм ятираж къызэрэхэхъуагъэр, ау джыри нахь Iоф адэшIэгъэн зэрэфаер ары. «Адыгэ макъэр» адыгабзэкIэ къызэрэдэкIырэм имызакъоу, лъэпкъым, республикэм афэгъэхьыгъэ къэбархэр бзэ зэфэшъхьафхэмкIэ (урысыбзэкIэ, тыркубзэкIэ ыкIи арапыбзэкIэ) тхыгъэхэу ащ исайт ибгъотэнхэ зэрэплъэкIыщтым мэхьанэшхо иIэу ылъытагъ.

ЗэдэгущыIэгъум икIэух КъумпIыл Мурат гъэзетитIум Iоф ащызышIэхэрэм джыри зэ къафэгушIуагъ, тапэкIи IэпыIэгъу къазэрэфэхъущтыр къариIуагъ.



Возврат к списку