РУС АДЫГ

Президентым ипшъэрылъхэр гъэцэкIагъэ зэрэхъухэрэм тегущыIагъэх

20.09.2017

Адыгеим и ЛIышъхьэу КъумпIыл Муратрэ муниципалитетым ипащэу Алексей Петрусенкэмрэ IофшIэгъу зэIукIэгъоу зэдыряIагъэм илъэхъан Мыекъопэ районым экономикэмкIэ ыкIи социальнэ лъэныкъомкIэ иIофхэм язытет тегущыIагъэх.

Урысые Федерацием и Президент ипшъэрылъхэр гъэцэкIагъэ зэрэхъухэрэм шъхьафэу ахэр къыщыуцугъэх. Шъугу къэтэгъэкIыжьы: Владимир Путиным зыIокIэ лъэхъаным КъумпIыл Мурат цIыфхэм ялъэIу тхылъхэр зыдэлъ уцышъо папкэр ащ къыритыжьыгъагъ. «Линие занкIэр» кIо зэхъум, къэралыгъом ипащэ цIыфхэр анахьэу зыгъэгумэкIырэ IофыгъохэмкIэ зыкъыфагъэзэгъагъ. ЛъэIу пстэуми япхыгъэ IофшIэныр аублагъ. Адыгеим и ЛIышъхьэ Мыекъопэ районым ипсэупIэ заулэхэм ащыIагъ. Социальнэ мэхьанэ зиIэ псэуалъэхэм защэIэ нэуж Iофыгъохэм ядэгъэзыжьынкIэ гъогу картэм изэхэгъэуцон фежьэнхэу унашъо афишIыгъ.

Алексей Петрусенкэм республикэм и ЛIышъхьэ къыригъэлъэгъугъ гъэцэкIэжьын IофшIэнхэр зищыкIэгъэ еджапIэхэмрэ кIэлэцIыкIу IыгъыпIэмрэ афэгъэхьыгъэ гъогу картэр. ГущыIэм пае, мы охътэ благъэхэм псэупIэу Къурджыпс дэт еджапIэм иунашъхьэ зэблахъущт ыкIи газыр ращэлIэщт. ПсэупIэу Первомайскэм дэт кIэлэцIыкIу IыгъыпIэм иджэхашъохэр зэблахъущтых, Цветочнэм дэт еджапIэм спортзалэу иIагъэр Iуахыщт, ублэпIэ еджапIэм иунашъхьэ зэблахъущт, Каменномостскэм дэт гурыт еджапIэу N 7-м джащ фэдэу иунашъхьэ зэблахъущт.

«Министерствэхэмрэ бизнес-сообществэмрэ зэгъусэхэу а еджапIэхэмрэ кIэлэцIыкIу IыгъыпIэмрэ яIофыгъохэр зэкIэ чэзыу-чэзыоу зэшIуахыщтых. О пшъхьэкIэ Iофхэр зэрэкIохэрэм улъыплъэн фае. Джыри зэ шъугу къэсэгъэкIыжьы: гъэсэныгъэ зыщарагъэгъотырэ учреждениехэм яIыгъынрэ ягъэцэкIэжьынрэкIэ ны-тыхэм зыпари атырагъакIэ хъущтэп, ар муниципалитетхэм япшъэрылъ», — къыIуагъ КъумпIыл Мурат.

Хэдзынхэм афэхъугъэ кIэуххэми зэдэгущыIэгъум илъэхъан анэсыгъэх. Районым ипащэ къызэриIуагъэмкIэ, хэдзакIохэм япроцент 28-рэ къекIолIэгъагъэр. Мэкъэтыным икIэуххэм нафэ къызэрашIыгъэмкIэ, народнэ депутатхэм ярайон Совет политикэ партие пстэуми ялIыкIохэр хэхьагъэх. Анахьыбэр — мандат 36-м щыщэу 27-р партиеу «Единэ Россием» хэтхэм аIукIагъ.

Адыгэ Республикэм и ЛIышъхьэ ипресс-къулыкъу



Возврат к списку