РУС АДЫГ

КъумпIыл Мурат, районхэм япащэхэр ягъусэхэу ныбжьыкIэхэр къушъхьэу Фыщт екIурэ гъогум техьагъэх

28.08.2017

Мы илъэсым Адыгеим иIэшъхьэтетхэмрэ сэнаущыгъэ зыхэлъ ныбжьыкIэхэмрэ язэIукIэгъу, официальнэу щымытэу, пхъэмашIом дэжь щыкIощт. ЩыIэкIэ-псэукIэ тэрэзым зиушъомбгъуным, тыкъэзыуцухьэрэ дунаир къэухъумэгъэным, спорт зекIоным хэхъоныгъэ ышIыным, тыкъэзыуцухьэрэ дунаим и Илъэс диштэу чIыопсыр къэухъумэгъэным мэхьанэшхо зэряIэр къыдалъытэзэ, сэнаущыгъэ зыхэлъ ныбжьыкIэхэм (илъэс 17-м къыщегъэжьагъэу илъэс 22-рэм нэс зыныбжьхэр) ямэфищ слет республикэм икъушъхьэхэм ащызэхащэнэу тыраубытагъ.

Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат хэлажьэзэ, тыгъуасэ туристхэр пчэдыжьым жьэу зекIо ежьагъэх. Нэбгыри 180-рэм ехъу ахэр мэхъух, муниципальнэ образованиехэм якомандэхэм пэщэныгъэ адызезыхьэхэрэр муниципалитетхэм япащэхэр ары. Ахэр Яворовэ гъэхъунэм къикIыхи, къушъхьэу Фыщт ылъэныкъокIэ куп-купэу ежьагъэх.

Инструктор IэпэIасэхэр ягъусэхэу ахэм мафэм километрэ 11,5-рэ фэдиз акIущт, Гъозэрыплъэ, Армянскэ къушъхьэтххэр зэпачыщтых. Кавказ биосфернэ заповедникым ичIыпIэ анахь дахэхэм ахэм ягъогу апхырыкIыщт, нафэу зэрэщытым-кIэ, илъэс къэс туристэу мыщ къакIорэр нахьыбэ мэхъу зэпыт.

Ягъогу зыщаухыщтыр Фыщт ары, ахэр ащ нэмысхэзэ, шыхэмкIэ ящыкIэгъэщт Iэмэ-псымэхэр а чIыпIэм рагъэолIэщтых. Слетым хэлажьэхэрэр хыгъэхъунэм щызэкIагъэнэщт пхъэмашIом къекIолIэщтых. Мыщ КъумпIыл Мурат ныбжьыкIэхэм гущыIэгъу щафэхъущт, Iофыгъоу зыгъэгумэкIхэрэм атегущыIэщтых, хабзэм имуниципальнэ къулыкъухэм ялIыкIохэм упчIэхэр аратышъущтых, ежьхэми игъоу алъэгъурэ IофхэмкIэ яшIошIхэр къаIощтых. Слетым иапэрэ мафэ адыгэ джэгукIэ аухыщт, Адыгеим лъэпкъ къашъомкIэ и Къэралыгъо академическэ ансамблэу «Налмэсым» иартистхэр ащ хэлэжьэщтых.

КъыкIэлъыкIорэ мафэм анахь псыхьэгъэ, анахь фытегъэпсыхьэгъэ кIалэхэр, инструкторхэр ягъусэхэу, къушъхьэу Фыщт дэкIоещтых. Нафэу зэрэщытымкIэ, Шъачэ дэт олимпийскэ стадион шъхьаIэм а къушъхьэм ыцIэ ехьы.

Слетым тегъэпсыхьагъэу патриотическэ Iофтхьабзи зэрахьащт, Хэгъэгу зэошхом хэлэжьагъэхэм апае анахь орэд дэгъумкIэ ныбжьыкIэхэм зэнэкъокъу зэхащэщт. 1942 — 1943-рэ илъэсхэм зэо пхъашэхэр мы чIыпIэм щыкIуагъэх. Хы ШIуцIэмрэ Закавказьемрэ якIурэ къушъхьэтхыхэр апсэ емыблэжьхэу советскэ дзэкIолIхэм пыим щаухъумагъэх.

ШышъхьэIум и 27-рэм слетым хэлажьэхэрэм къагъэзэжьыщт.



Возврат к списку