РУС АДЫГ

ЯIо зэхэлъэу Iоф зэдашIэ

29.07.2020

Адыгэ Республикэм и Къэралыгъо Совет – Хасэм тыгъуасэ зэхэсыгъоу иIагъэм хэлэжьагъ Адыгеим и ЛIышъхьэу КъумпIыл Мурат. Iофтхьабзэр зэрищагъ республикэ Парламентым и Тхьаматэу Владимир Нарожнэм.

Адыгеим и ЛIышъхьэ депутатхэм Iофэу ашIэрэм осэшIу фишIыгъ ыкIи шъолъырым игъэцэкIэкIо хэбзэ къулыкъухэм зэгурыIоныгъэ адыряIэу зэрадэлажьэхэрэм фэшI зэрафэразэр ариIуагъ. Пандемием илъэхъан сымаджэхэм япчъагъэ республикэм лъэшэу зыкъыщимыIэтыным, зэпахырэ узым пэшIуекIогъэным фэшI ящыкIэгъэ амал пстэури зэрагъэгъотын зэралъэкIыгъэм мэхьанэшхо иIагъэу ылъытагъ. Шъолъырым ихэбзэ къулыкъухэм яIо зэхэлъэу Iоф зэрэзэдашIагъэм ишIуагъэ- кIэ пшъэрылъыр гъэцэкIагъэ хъугъэ.

– Непэ Iофхэм язытет къызэригъэлъагъорэмкIэ, пандемием емылъытыгъэу, лъэпкъ проектхэм ягъэцэкIэн Адыгеим щылъытэгъэкIуатэ. Лъэныкъо зэфэшъхьафхэмкIэ зэфэхьысыжь дэгъухэр тиIэх. Анахьэу зигугъу къэпшIын плъэкIыщтхэр гъогухэм ыкIи социальнэ псэуалъэхэм яшIын, мэхьанэшхо зиIэ объектхэм ягъэцэкIэжьын ыкIи шэпхъэшIухэм адиштэрэ къэлэ щыIакIэр гъэпсыгъэныр ары, – къыIуагъ КъумпIыл Мурат.

Ащ дакIоу республикэм игъэцэкIэкIо ыкIи хэбзэгъэуцу къулыкъухэм язэпхыныгъэ агъэпытэзэ тапэкIи Iоф зэдашIэным мэхьанэшхо зэриIэр Адыгеим и ЛIышъхьэ къыхигъэщыгъ. Анахьэу ынаIэ зытыридзагъэр лъэпкъ проектхэр муниципалитетхэм зэращагъэцакIэхэрэм депутатхэр лъыплъэнхэр ары.

– Парламентскэ каникулхэр къызщысыгъэ уахътэм ехъулIэу шIуагъэ къытэу гъэцэкIэкIо хэбзэ къулыкъухэм Iоф зэрадашIагъэмкIэ депутатхэм сызэрафэразэр ясIомэ сшIоигъу. Лъэпкъ проектхэм ямызакъоу, шъолъырым социальнэ-экономикэ хэхъоныгъэ ышIыным фытегъэпсыхьэгъэ унэе программэм игъэцэкIэни мы илъэсым тыфежьагъ. Мы Iофтхьабзэхэм Адыгеим амалэу IэкIэлъхэм зэрэхагъэхъощтым, шIуагъэ къызэрахьыщтым сицыхьэ телъ, – къыIуагъ КъумпIыл Мурат.



Возврат к списку