РУС АДЫГ

Апэрэ классым кIохэрэм шIухьафтынхэр аратыщтых

23.08.2017

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат кIэщакIо фэхъуи, «Апэрэ классым кIорэм шIухьафтын етыгъэныр» зыфиIорэ Iофтхьабзэр Адыгеим зыпкъ щырагъэуцожьыгъ. Мы илъэсым апэрэу еджапIэм кIощт кIэлэцIыкIу пстэуми ащ тегъэпсыхьагъэу къызфагъэфедэщт Iэмэ-псымэ цIыкIухэр зэхэубытагъэу аратыщтых.

А Iофтхьабзэм изэхэщэн пэIуагъэхьанэу республикэ бюджетым сомэ миллиони 9 къыхагъэкIыгъ. Адыгеим гъэсэныгъэмрэ шIэныгъэмрэкIэ и Министерствэ муниципалитетхэм шIухьафтынхэр атегощэгъэнхэм Iоф дешIэ.

ЗэрагъэунэфыгъэмкIэ, мы илъэсым республикэм ис кIэлэцIыкIу 6100-рэ еджапIэм апэрэу кIощт. Нэбгырэ пэпчъ шIухьафтын фагъэхьазырыгъ.

ШIэныгъэм и Мафэ кIэлэцIыкIу пэпчъ папкэ дахэ ратыщт, ащ тетрадьхэр, альбомхэр, къэлэмхэр, ручкэхэр, краскэхэр ыкIи нэмыкIхэр дэлъыщтых. ЕджэнымкIи творчествэмкIи кIэлэцIыкIухэм къызфагъэфедэн алъэкIыщт пкъыгъо 26-рэ ащ дэлъыщт.

Апэрэ классым кIорэ кIэлэцIыкIу пэпчъ идокумент шъхьаIэ — дневникыр фагъэхьазырыгъ. Апэрэ нэкIубгъуиир Адыгэ Республикэм фэгъэхьыгъ, лъэпкъ шъуашэр, тхыпхъэхэр, республикэм икъэралыгъо тамыгъэхэр нэкIубгъохэм атетых.



Возврат к списку