РУС АДЫГ

Лъэмыджым игъэцэкIэжьын аухыгъах пIоми хъущт

16.08.2017

Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат къалэу Мыекъуапэ иурамэу Шэуджэным ыцIэкIэ щытым телъ лъэмыджым игъэцэкIэжьын зэрэкIорэр зэригъэлъэгъугъ.

Псэуалъэм епхыгъэ IофшIэн шъхьаIэхэр аухыгъахэх, бетон кIэгъэкъонхэр зыпкъ рагъэуцожьыгъэх, асфальтыр зэблахъугъ, гъогубгъухэри зэрищыкIагъэм тетэу зэтырагъэпсыхьагъэх. Джы подрядчикыр зыуж ихьагъэр лъэмыджым екIурэ гъогухэм ягъэцэкIэжьын ары. Ащ нэужым транспортым пае лъэмыджыр къызэIуахыщт.

Республикэм ипащэ къалэу Мыекъуапэ имэрэу Александр Наролинымрэ подряднэ организацием идиректорэу Хьабэхъу Аскэррэ анаIэ тыраригъэдзагъ гъогум игъэцэкIэжьын дэгъоу ыкIи ипIалъэм ухыгъэ хъун зэрэфаем. Шъугу къэтэгъэкIыжьы: илъэсэу икIыгъэм гъатхэм республикэм ипащэхэм псэолъэшIхэм пхъашэу къафагъэпытэгъагъ гъэцэкIэжьын IофшIэнхэр 2017-рэ илъэсым Iоныгъом аухынхэу.

Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат лъэмыджым изытет зызэрегъэлъэгъу нэужым зэIукIэ заулэ зэхищэгъагъ, ащ пшъэрылъ къащыфишIыгъагъ игъом гъэцэкIэжьынхэр зэраухыщтхэм имызакъоу, дэгъоуи IофшIэнхэр агъэцэкIэнхэу.

Непэрэ уплъэкIуным илъэхъан КъумпIыл Мурат муниципалитетымрэ министерствэмрэ пшъэрылъ гъэнэфагъэхэр къафигъэуцугъэх гъогу отраслэм епхыгъэу.

«Илъэсэу къихьащтым къалэу Мыекъуапэ игъогухэм ягъэцэкIэжьынрэ яшIынрэ ахъщэу апэIудгъахьэрэр нахьыбэ тшIын мурад тиI. Урамхэу мыжъо гъэушкъоигъэ зытелъхэу асфальт зытегъэчъыхьэгъэн фаехэр къэжъугъэнафэх. Ащ нэмыкIэу машинэхэр зыдагъэуцущтхэ чIыпIэхэм япхыгъэ Iофыгъохэм язэшIохынкIи къалэм ипащэхэм игъоу алъэгъухэрэр къаIонхэу сяжэ. НэмыкI къалэхэм яопыт зыщыжъугъэгъуаз, гъэцэкIэжьын IофшIэнхэр зэшIозыхыхэрэм зэрищыкIагъэм тетэу шъуадэлажь, цIыфхэр анахьыбэу зыщызэхэхьэхэрэ чIыпIэхэм машинэ гъэуцупIэхэр яIэнхэ фае», — къыIуагъ КъумпIыл Мурат.

Ащ дакIоу республикэм икъэлэ шъхьаIэ ищагухэм язэтегъэпсыхьани нэсыгъэх. Программэу «Джырэ къалэм игъэпсын» зыфиIорэм диштэу мы илъэсым Мыекъуапэ ищагу 19 зэтырагъэпсыхьащт.



Возврат к списку