РУС АДЫГ

Автомобильхэр рыкIохэ хъугъэ

14.02.2017

Адыгэ Республикэм и Правительствэ зычIэт унэм ыгупэкIэ урамэу Жуковскэм ыцIэкIэ щытым тыгъуасэ къыщегъэжьагъэу автомобильхэр рыкIохэ хъугъэ.

Специалистхэм гъогум тет тамыгъэхэр зэблахъугъэх, транспортыр къыщыуцу зэрэмыхъущтым, эвакуаторым Iоф зэришIэрэм анаIэ тырязыгъэдзэрэ нэмыкI тамыгъэхэр агъэуцугъэх. Къалэу Мыекъуапэ игупчэ инэмыкI урамхэм автомобильхэр  зым зыр ежэжьэу зэрэщызэтырихьэхэрэм фэдэу щымытыжьынымкIэ схемакIэм ишIуагъэ къэкIощт.

Шъугу къэтэгъэкIыжьы: урамэу Жуковскэм ыцIэкIэ щытым автомобильхэр рыкIонхэ алъэкIынэу шIыгъэным пае Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат Мыекъуапэ имэрэу Александр Наролиным IофшIэгъу зэIукIэгъу зыдыреIэм пшъэрылъ фишIыгъагъ. Республикэм ипащэ къызэрэхигъэщыгъэмкIэ, къалэм машинэуцупIэу иIэр нахьыбэ шIыгъэным иIофыгъуи ащ зэшIуихын фае. Ащ нэмыкIэу КъумпIыл Мурат пшъэрылъ къыгъэуцугъ специалистхэр къыхагъэлажьэхэзэ къалэм игъогухэм яхэхъоныгъэ, язэтегъэпсыхьан истратегие агъэнэфэнэу. Арэущтэу зыхъукIэ, цIыфхэм ящыIакIэ нахь щынэгъончъэщт, нахь Iэрыфэгъу амалхэр агъотыщтых.



Возврат к списку