РУС АДЫГ

Километрэ 37-рэ фэдиз зикIыхьэгъэщт дамбэхэр ашIыщтых

10.08.2017

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат псы IофхэмкIэ Пшызэ гъэIорышIапIэм ипащэу Геннадий Саловым зыIокIэм псыхъохэм янэпкъхэм ягъэпытэнрэ яукъэбзынрэ япхыгъэ Iофыгъохэм атегущыIагъэх.

Мы зэдэгущыIэгъум хэлэжьагъэх Адыгэ Республикэм и Премьер-министрэ игуадзэу Сапый Вячеслав, Адыгэ Республикэм тыкъэзыуцухьэрэ дунаим ыкIи чIыопс къэкIуапIэхэм якъэухъумэнкIэ и ГъэIорышIапIэ ипащэу Сергей Колесниковыр, КБВУ-м ипащэ игуадзэу Бырсыр Тембот, Краснодар псыIыгъыпIэм идиректор ипшъэрылъхэр зыгъэцэкIэрэ Владимир Грищенкэр.

Сергей Колесниковым къызэриIотагъэмкIэ, федеральнэ программэу «Псы хъызмэт комплексым 2020-рэ илъэсым нэс хэхъоныгъэу ышIыщтыр» зыфиIорэм республикэм ипсэолъищ къыхиубытагъ. Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат псы къэкIуапIэхэмкIэ Федеральнэ агентствэм ипащэ ипшъэрылъхъэр зыгъэцэкIэрэ Вадим Никаноровым бэмышIэу дыриIэгъэ зэIукIэгъум ащ фэдэ зэзэгъыныгъэ щызэдашIыгъ.

Селоу Вольнэм дэжь псыхъоу Лабэ километри 4,1-рэ зикIыхьэгъэщт дамбэу щашIыщтым ипроект-сметэ документацие зэхъокIыныгъэхэр фэшIыгъэнхэм епхыгъэ IофшIэныр ыкIэм фэкIо. Псыхъоу Фарзэ идамбэу километрэ 29,1-рэ зикIыхьагъэр, джащ фэдэу псыхъоу Псынэф идамбэу километри 3,8-рэ фэдиз хъурэм яигъэкIотыгъэ гъэцэкIэжьын ипроект пэIухьащт мылъкур къыхагъэкIыгъах.

КБВУ-м ипащэу Геннадий Саловым къыIуагъ мы проектхэм ягъэцэкIэн ыкIи джащ фэдэу Адыгеим инэмыкI чIыпIэхэм ащагъэцэкIэщтхэм ахэлэжьэным зэрэфэхьазырыр. Мыекъопэ ГЭС-м къыщегъэжьагъэу пышIэгъэ ятIонэрэ лъэмыджым нэс Шъхьэгуащэ инэпкъхэм ягъэпытэн тегущыIагъэх.

Анахьэу зыгъэгумэкIыхэу къызщыуцугъэхэм ащыщ псыхъохэм янэпкъхэр укъэбзыгъэнхэр. Республикэм ипащэ Адыгеим и Премьер-министрэ игуадзэу Сапый Вячеславрэ мы IофымкIэ ГъэIорышIапIэм ипащэу Сергей Колесниковымрэ, ащ игъусэщт Бырсыр Темботи, а IофшIэныр лъагъэкIотэнэу пшъэрылъ афишIыгъ. ГущыIэм пае, гъатхэм псыр къызыдэкIым кIэух гумэкIыгъоу къыздихьыгъэхэр дэгъэзыжьыгъэнхэм пае техникэр къаIэкIагъэхьащт, Хьакурынэхьаблэ, Хьатыгъужъыкъуае ыкIи Пщычэу алъэныкъокIэ псыхъоу Фарзэ инэпкъхэм яукъэбзынкIэ Iофтхьабзэу зэрахьащтхэр агъэнэфагъэх. Джащ фэдэу псыхъоу Щэхъураджи инэпкъ гъэкъэбзэгъэн фае.

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат къэзэрэугъоигъэхэм къяджагъ зигугъу къэтшIыгъэ Iофым пшъэдэкIыжь ин хэлъэу екIолIэнхэу.

«Республикэм ис цIыфхэм ящынэгъончъагъэкIэ тэ пшъэдэкIыжь тэхьы, арышъ, псы нэпкъхэр укъэбзыгъэнхэмкIэ, дамбэхэр шIыгъэнхэмкIэ Iофыгъоу къэуцухэрэр нахь шIогъэ ин хэлъэу зэрэзэшIотхыщтхэм тынаIэ ренэу тедгъэтын фае. Гъатхэм псыр къызэрэдэкIыгъагъэм ыпкъ къикIэу цIыфхэм зэрарышхо ахьыгъ ыкIи ащ фэдэ гумэкIыгъохэр къэмыхъужьынхэм тынаIэ тедгъэтыным мэхьанэшхо иI», — къыIуагъ КъумпIыл Мурат.



Возврат к списку