РУС АДЫГ

Стадионыр къызэIуахыжьыгъ

06.07.2017

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат Теуцожь районымкIэ къуаджэу Пэнэжьы-къуае щагъэкIэжьыгъэ стадионым щыIагъ.

Республикэм ипащэ игъусагъ Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэм иаппарат АдыгеимкIэ ифедеральнэ инспектор шъхьаIэу Сергей Дрокиныр.

Муниципальнэ бюджетымрэ спонсорхэмрэ ямылъкукIэ стадионыр агъэкIэжьыгъ. Фирмэу ООО-у «Дортранссерфис» зыфиIорэм идиректорэу Хьабэхъу Аскэр футбол ешIапIэм, къэчъыхьапIэхэм, джэгупIэхэм язэтегъэпсыхьан ыпшъэ рилъхьажьыгъ. ПстэумкIи предприятием сомэ миллиони 6,5-м ехъу а гухэлъхэм апае къыхигъэкIыгъ. Муниципалитетым стадионыр инженер инфраструктурэм пишIагъ.

Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэр тренерхэмрэ спортсмен ныбжьыкIэхэмрэ къафэгушIуагъ, Адыгэ Республикэм физкультурэмрэ спотымрэкIэ и Комитет пшъэрылъ фишIыгъ стадионым тренажерхэр щигъэуцунхэу.

КъумпIыл Мурат унашъо зэришIыгъэм тетэу мы илъэсым Теуцожь районым спорт оборудованиер ратыгъагъ. 2018-рэ илъэсым къуаджэу Пэнэжьыкъуае цIыфхэм япсауныгъэ зыщагъэпытэщт физкультурэ комплекс щагъэпсынэу рахъухьэ.



Возврат к списку