РУС АДЫГ

Адыгэ къуаер республикэ закъор ары къызщыдагъэкIын фитыщтхэр

19.01.2018

Мыщ фэдэ унашъо ышIыгъ Урысые Федерацием и Апшъэрэ Хьыкум. Шъугу къэдгъэкIыжьын, нэмыкI шъолъырхэм ащыIэ предприятиехэм адыгэ къуаер къыдагъэкIынымкIэ фитыныгъэ зэраIахыгъэм емызэгъхэу ахэм хьыкумым зыфагъэзэгъагъ.

Адыгэ къуаер къыдэзыгъэкIыхэрэм я Союз июристэу Наталья Логуновам къызэрэтиIуагъэмкIэ, кассационнэ тхьаусыхэ тхылъэу къырахьылIагъэр экономикэ IофыгъохэмкIэ хьыкум коллегием зэхифыныр имыщыкIагъэу УФ-м и Апшъэрэ Хьыкум ылъыти, щылэ мазэм и 12-м ар зэкIигъэкIожьыгъ.

Урысыем ишъолъырхэм ямызакъоу, IэкIыб къэралыгъохэми адыгэ къуаер дэгъоу ащашIэ, ыцIэ чыжьэу Iугъэ. ИIэшIугъэкIэ, изэхэлъыкIэкIэ ащ ебгъэпшэнэу щыIэр макIэ. Ижъырэ лъэхъаным къыщегъэжьагъэу мы гъомылапхъэм адыгэхэм осэшхо фашIы, агъэлъапIэ.

Адыгэ Республикэм и ЛIышъхьэу КъумпIыл Мурат республикэм ибренд шъхьаIэу адыгэ къуаем хэхъоныгъэ ышIыным мэхьанэшхо реты. Мы шхыныгъор нахьыбэу къыдэдгъэкIымэ, ащ епхыгъэ лъэныкъом зэзэриушъомбгъущтыр къыхегъэщы. Ащ пае адыгэ къуаер къыдэзыгъэкIыхэрэм я Союз республикэм щызэхащагъ.

Адыгэ къуаер тыди зэрэщызэлъашIэрэр къызфагъэфедэзэ, илъэс пчъагъэхэм къакIоцI ар нэмыкI шъолъырхэм Iоф ащызышIэрэ хъызмэтшIапIэхэм къыдагъэкIыщтыгъ. Специалистыбэмэ, цIыф къызэрыкIохэм зэралъытэрэмкIэ, иIэшIугъэкIи, изэхэлъыкIэкIи Адыгеим къыщыдагъэкIырэм ар лъэшэу текIыщтыгъ. «Адыгэ къуай» зытетхэгъэ продукциер къызщыдэбгъэкIын плъэкIыщт закъор тиреспублик ары. Ащ фэдэ унашъо блэкIыгъэ илъэсым ашIыгъагъ. Ау нэмыкI къыдэгъэкIакIохэр ащ къемызэгъхэу хьыкумым зызэрэфагъэзагъэр ары дэо тхылъым лъапсэ фэхъугъэр.

Хьыкумым унашъоу ышIыгъэм республикэм ифитыныгъэхэр къыухъумагъэх ыкIи нэмыкI шъолъырхэм Iоф ащызышIэрэ предприятии 4-м къапкъырыкIыгъэ зэмызэгъыныгъэм ар кIэух фэхъугъ.

— РеспубликэмкIэ мыр апэрапшIэу экономическэ къэкIуапI. Дунаим щызэлъашIэгъэ лъэпкъ шхыныгъо къыдэтэгъэкIымэ, ар продукцие нэпцIым щытыухъумэныр типшъэрылъ шъхьаI. УФ-м и Премьер-министрэу Дмитрий Медведевыр Адыгеим зыщэIэм, Адыгеим ибренд шъхьаIэу адыгэ къуаем иIэшIугъэ уасэ фишIыгъ ыкIи тишхыныгъо шъхьаIэ къэтыухъумэн зэрэфаем дыригъэштагъ, — къыIуагъ АР-м и ЛIышъхьэ.

Шъолъыр брендхэр зэлъягъэшIэгъэнхэмкIэ IэпыIэгъу афэхъугъэным фытегъэпсыхьэгъэ пшъэрылъэу УФ-м и Федеральнэ ЗэIукIэ ФедерациемкIэ и Совет и Тхьаматэу Валентина Матвиенкэм сенаторхэм афигъэуцугъэм зэрэдыригъаштэрэр КъумпIыл Мурат къыIуагъ. Брендэу «Адыгэ къуаем» республикэмкIэ мэхьанэшхо зэриIэр хигъэунэфыкIыгъ.

— Тибрендэу «Адыгэ къуаер» тапэкIи нахь зэлъашIэныр зэтпхырэр зекIоным хэхъоныгъэхэр ышIынхэр ыкIи мэкъу-мэщым илъэныкъо зырызхэр ары. Мы уахътэм тикъэралыгъо къыщыдагъэкIырэ гастрономическэ брендхэр пштэхэмэ, адыгэ къуаер анахь зэлъашIэрэмэ, агъэфедэрэмэ ашыщ, а лъэныкъомкIэ я 3-рэ чIыпIэр ыIыгъ. Ар къеушыхьаты илъэс къэс республикэм адыгэ къуаем ифестивалэу щызэхатщэрэм хэлажьэхэрэ цIыфхэм япчъагъэ зэрэхэхъуагъэр, — къыIуагъ КъумпIыл Мурат.

2017-рэ илъэсым Адыгеим адыгэ къое тонн мин 12,8-рэ къыщыдагъэкIыгъ, 2016-м егъэпшагъэмэ, а пчъагъэр процент 12-кIэ нахьыб.



Возврат к списку