РУС АДЫГ

Владимир Путиным дышъэ медалыр МэщбэшIэ Исхьакъ къыритыжьыгъ

29.04.2019

Кремлым и Екатерининскэ зал тыгъуасэ дышъэ медалэу «Урысые Федерацием IофшIэнымкIэ и ЛIыхъужъ» зыфиIорэр къащаратыжьыгъ.

Урысыем и Президентэу Владимир Путиныр ары Урысыем щыщ нэбгыритфэу къэралыгъомрэ цIыфхэмрэ апашъхьэ гъэхъэгъэ ин дэдэхэр щызиIэхэм а наградэр къязытыжьыгъэр.

Адыгеим, Къэбэртэе-Бэлъкъарым, Къэрэщэе-Щэрджэсым ялъэпкъ тхакIоу, Адыгеим итхакIохэм я Союз иправление итхьаматэу МэщбэшIэ Исхьакъи ащ фэдэ дышъэ медаль къыфагъэшъошагъ.

Мыщ фэдэ наградэ къаратыжьыгъ АО-у «Южморрыбфлот» зыфиIорэм ипащэу Сергей Антоновым, мэшIокугъогу станциеу Инскэм идежурнэу Ольга Бочкаревам, заводэу «Красное Сормово» игенеральнэ директор иупчIэжьэгъоу Николай Жарковым, Къэралыгъо академическэ театрэу Е. Вахтанговым ыцIэкIэ щытым иартистэу Василий Лановоим.

«ЖъоныгъуакIэм и 1-р къызыщыблагъэрэм ехъулIэу сыкъышъуIукIэнэу ыкIи Урысыем IофшIэнымкIэ и ЛIыхъужъ идышъэ медаль къышъостыжьынэу зэрэхъугъэр лъэшэу сигуап. Мыщ фэдэ медаль зыфагъэшъуашэхэрэр цIыф цIэрыIохэр, лэжьэкIошхохэр, хэгъэгум ыпашъхьэ гъэхъэгъэшхохэр щызиIэхэр ары. Шъори джащ фэдэу шъущыт, Урысыем, шъуищыIэныгъэ зэшъупхыгъэ Iофым шъуишъыпкъэу шъуафэлажьэ», — закъыфигъэзагъ мыщ фэдэ гущыIэхэмкIэ Урысыем и Президентэу Владимир Путиным дышъэ медалыр къызыфагъэшъошагъэхэм.

Урысыем и Президент ащ фэдэ наградэр къызэратыгъэ пэпчъ гъэхъагъэу иIэхэр хигъэунэфыкIыгъ. МэщбэшIэ Исхьакъ илитературнэ творчествэкIэ культурэхэр нахь зэпэблагъэ зэришIырэр, Урысыем щыпсэурэ лъэпкъ зэфэшъхьафхэм якIэн зэригъэбагъорэр Президентым хигъэунэфыкIыгъ.

«Хэгъэгу зэошхом илъэхъан къэхъугъэхэр адыгэ тхакIоу ыкIи усакIоу МэщбэшIэ Исхьакъ Шумафэ ыкъом илитературнэ IофшIагъэхэм къащигъэлъэгъуагъэх. Ащ илирикэ, Темыр Кавказым ищытхъу зыIотэрэ итхыгъэхэм урысыбзэкIи, нэмыкIыбзэхэмкIи яджэх, хэгъэгум иклассикхэм япроизведениехэр адыгабзэкIэ зэрэзэрадзэкIыжьыгъэхэри гушIуагъоу щыт. Ау, гухэкI нахь мышIэми, Советскэ Союзым илъэхъан зэрэщытыгъэм фэдэу, мы аужырэ илъэсхэм а IофшIэным ащ фэдизэу зиушъомбгъурэп. Мы лъэныкъом тэ бэу щычIэтэнэ, а пстэур зыпкъ игъэуцожьыгъэн фае. Мы лъэныкъомкIэ Iофышхо зэрэпшIэрэм пае лъэшэу тыпфэраз», — къыIуагъ Владимир Путиным.

МэщбэшIэ Исхьакъ дышъэ медалыр къыратыжь зэхъум Адыгеим илIыкIо купэу КъумпIыл Мурат зипащэр щыIагъ. Ахэм ахэтыгъэх Адыгеим ыцIэкIэ сенаторхэу Хъопсэрыкъо Муратрэ Олег Селезневымрэ, Адыгеим ыцIэкIэ Къэралыгъо Думэм идепутатэу Хьасанэкъо Мурат, общественнэ организациехэм ялIыкIохэу Сэхъурэкъо Хьаутирэ Дзыбэ Кимэрэ.

Iофтхьабзэм джащ фэдэу хэлэжьагъэх Къэрэщэе-Щэрджэсым и ЛIышъхьэу Темрезов Рэщыдрэ Къэбэртэе-Бэлъкъарым и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэу КIокIо Казбекрэ. Шъугу къэтэгъэкIыжьы МэщбэшIэ Исхьакъ тхылъ 60-м ехъу зэритхыгъэр, дунаим щыпсэурэ лъэпкъхэм ябзабэхэмкIэ ахэр зэрэзэрадзэкIыжьыгъэхэр. Тхьабысымэ Умар игъусэу Адыгэ Республикэм игимн ащ къыхихыгъ. Литературнэ творчествэм нэмыкIэу, ар хэгъэгуми, республикэми яобщественнэ, яполитикэ щыIэныгъэ чанэу хэлажьэ: СССР-м инароднэ депутатэу щытыгъ, СССР-м и Апшъэрэ Совет хэтыгъ. Джыдэдэм Урысыем и Общественнэ палатэ хэт.



Возврат к списку