РУС АДЫГ

Къэлэ шIыхьафым цIыфхэр зэхищагъэх

25.03.2017

УФ-м и Президент иунашъокIэ 2017-рэ илъэсыр экологием и Илъэсэу агъэнэфагъ. Ащ къыдыхэлъытэгъэ Iофтхьабзэхэр Адыгеим щырагъэкIокIых, псэупIэхэр гъэкъэб-зэгъэнхэм республикэм ипащэхэм анаIэ тет.

БлэкIыгъэ шэмбэтым къэлэ шIыхьафэу Мыекъуапэ щыкIуагъэм министерствэхэм ыкIи ведомствэхэм, къэлэ администрацием, бюджет организациехэм, предприятиехэм ялIыкIохэр, кIэлэеджакIохэр, студентхэр хэлэжьагъэх. Къэлэ гупчэ паркым къекIолIагъэх ыкIи мыщ чъыгхэр щагъэтIысыгъэх Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Муратрэ муниципальнэ образованиеу «Къалэу Мыекъуапэ» иадминистрацие ипащэу Александр Наролинымрэ.

Къэлэ паркым шIоеу, хэкIэу дэлъыр къулыкъу ыкIи ведомствэ зэфэшъхьафхэм яIофышIэхэм аугъоигъ, нэужым дащыгъ.

— ТипсэупIэхэр тэры зыушIоихэрэр, арышъ, тэр-тэрэу ахэр дкъэбзэнхэми тыпылъын, типшъэрылъын фае. Непэ зэхэтщэгъэ шэмбэт шIыхьафым цIыфхэм дырагъэштагъ, ащ ишыхьатэу ахэр къыдэкIыгъэх, мары зэрэшъулъэгъоу алъэкI къамыгъанэу тикъэлэ шъхьаIэ игъэкъэбзэн яIахь къыхалъхьэ. Iофтхьабзэм къыхэлэжьэгъэ пстэуми сызэрафэразэр ясIо сшIоигъу, нэмыкI муниципалитетхэми мыщ щысэ тырахынышъ, шIыхьафхэр зэхащэнхэу тыщэгугъы, — къыIуагъ КъумпIыл Мурат.

Мы илъэсыр экологием и Илъэсэу зэрэщытыр къыдалъытэзэ, къалэм игъэкъэбзэн ыкIи изэтегъэпсыхьан епхыгъэ Iофтхьабзэхэр зэрэзэхащэхэрэр къыIуагъ Мыекъуапэ иадминистрацие ипащэ.

— Республикэм ипащэхэр IэпыIэгъу къытфэхъухэзэ мы илъэсымкIэ апэрэ гъэтхэ шэмбэт шIыхьафыр зэхэтщагъ. Къэлэ паркым чъыг 15 щыдгъэтIысыгъ. Мы аужырэ илъэси 3-р пштэмэ, ахэм япчъагъэ миным ехъу. Мыекъуапэ сыдигъуи къэлэ къабзэу, зэтегъэпсыхьагъэу зэрэщытыгъэм игъогу тытемыкIэу, нахь дахэу, гупсэфэу зэрэщытыщтым тапэкIи тыпылъыщт, — къыIуагъ Александр Наролиным.

Шэмбэт шIыхьафым къыдыхэлъытагъэу тикъэлэ шъхьаIэ ичIыпIэ зэфэшъхьафхэр агъэкъэбзагъэх, бордюрхэр агъэлагъэх. Фэтэрыбэу зэхэт унэхэм ащыпсэухэрэми алъэкI къагъэнагъэп, ящагу кIоцIхэр аукъэбзыгъэх, чъыгхэр агъэлагъэх. Мыщ фэдэ Iофтхьабзэхэм цIыфхэр нахьыбэу ахэлажьэхэ  къэс типсэупIэхэм язытет нахьышIу хъущт, арышъ, пстэуми тызэгъусэу тикъэлэ шъхьаIэ имызакъоу, нэмыкIхэри зэрэдгъэкъэбзэщтхэм тыпыжъугъэлъ, ахэм ятеплъэ зыфэдэщтыр тэры, ахэм ащыпсэухэрэр ары, зынапэр.

ТХЬАРКЪОХЪО Адам.

Сурэтыр А. Гусевым тырихыгъ.




Возврат к списку